भारत खे वरी विश्वगुरू बणाइण जे हलंदड़ तहरीक में सिन्धी समाज पिणु निभाए कारगर रोल : साईं मसन्द
_____________________________________
लखनऊअ में संत आसूदाराम साहिब जे 61हें वर्सी महोत्सव में ॾिनो व्याख्याणु
_____________________________________
रायपुर। मसन्द सेवाश्रम रायपुर पारां सेप्टेम्बर 2012, क़रीब 9 सालनि खां मुल्क जे महान संतनि जे सहकार सां भारत खे वरी ॿीहर विश्वगुरू ऐं आसूदो मुल्कु बणाइण लाइ मुल्क में वरी धर्म जो शासनु क़ाइम कराइण जो तहरीकु हलायो वञी रहियो आहे। सेवाश्रम जे गादेसर साईं जलकुमार मसन्द साहिब जनि लखनऊअ में कुछु ॾींहं अॻु कोठायल संत आसूदाराम साहिब जनि जे 61हें वर्सी महोत्सव में इन योजना ते विस्तार सां रोशनी विझंदे सिन्धी क़ौम जे संतनि ऐं समाज सेवकनि खे पिणु हिन तहरीक में पंहिंजो कारगर रोल निभाइण जी पुकार कई।
साईं मसन्द साहिब जनि चयो त भूतकाल में भारत जे विश्वगुरू ऐं आसूदो मुल्कु हुअण जो मुख्यु आधारु देश में धर्म जे शासन जी रीति लाॻू हुअणु रहियो आहे। इन रीति हेठि हर युॻ में मुल्क जी हुकूमत करण वारे हर नन्ढे-वॾे राजा जो हिकु राजगुरू हुअणु ज़रूरी हो। समूरा राजा पंहिंजनि राजगुरुनि जी रहनुमाईअ में राजकाज हलाईन्दा हुआ। राजाउनि जा राजगुरू ईश्वर जी वाणी मञे वेन्दड़ सनातन वैदिक ज्ञान जा उतमु ज्ञानी हून्दा हुआ। सनातन वैदिक उसूल जिते इन्सानी जीवन खे हिक तरफ सुखी, आसूदो ऐं कल्याणकारी बणाइन था, उते ॿिए तरफ हू असांजे जीवन जे मूल मक़सद ईश्वर खे प्राप्त करण जी राह पिणु रोशन कन्दा आहिन।
हुननि चयो त भारत जे इतिहास में असां पातो आहे त जॾंहिं बि कंहिं राजा पंहिंजे राजगुरूअ खां मुंहुं मोड़े पंहिंजे मन मुताबिक़ राजकाज हलायो, तॾंहिं-तॾंहिं हू राजा धीरे-धीरे भ्रष्ट थी वेन्दा हुआ। इनजो सबबु इहो आहे त हू राजगुरूअ खां परे थियण सां दरअसल आध्यात्म खां दूर थी वेन्दा हुआ। हुननि ॿुधायो त इन्सान जो सुभाउ आहे त हू जॾंहिं आध्यात्म सां जुड़ियलु रहन्दो आहे तॾंहिं हू परउपकारी रहन्दो आहे ऐं जॾंहिं आध्यात्म खां दूर हून्दो आहे तॾंहिं हू धीरे-धीरे सुआर्थी थी वञण खां अलावा आमतौरु बदचलन पिणु थी वेन्दो आहे।
हुननि चयो त अहिड़ी हालत में जे कंहिं मुल्क जो हाकिमु अधर्मी थी वेन्दो हो त उनजो अस़रु हुनजे अवाम ते पिणु पवन्दो हो। जहिड़ो राजा तहिड़ी प्रजा जी चवणी इन ही आधार ते ठहियल आहे। इन सां मुल्क में धीरे-धीरे हैवानियत ऐं पाप वधी वेन्दा हुआ। हुननि चयो त इतिहास गवाह आहे त जॾंहिं-जॾंंहिं पापु वधी वेन्दो आहे तॾंहिं-तॾंहिं उनजे निवृतीअ लााइ ईश्वर हर बार मुल्क जी हुकूमत धर्मी माणहुनि खे ॾिआरे मुल्क में वरी धर्म जो शासनु क़ायम कराईन्दा रहिया आहिन। ईश्वर जे सभिनी अवतारनि जो मुख्यु मक़सदु इहो ही रहियो आहे।
साईं मसन्द साहिब चयो त आज़ादीअ खां पोइ मुल्क में हुकूमत लाइ लाॻू लोकशाही रीति हेठि हाणोका हुकुमरान रूपी चूण्डिजन्दड़नि लोक सेवकनि लाइ संविधान में हुननिजे आध्यात्म सां जुड़ियलु रहण जो को ज़रूरी बन्दोबस्तु लाॻू कोन आहे। इन सबब आमतौरु लोक सेवक सुआर्थी ऐं भ्रष्ट थींदा वया आहिन। इन सां मुल्क में कुछु सालनि खां पाप जा कम आसमान जी बुलन्दी छुअण लॻा आहिन। मुल्क जे लॻभॻ हर ज़िले में आए ॾींहं मासूम अॿोझ कन्याउनि सां थीन्दड़ बुरा कम पाप जे हद जी निशानी आहे। अहिड़ो पापु त शायदि कंहिं युॻ में कोन थियो हून्दो।
हुननि चयो त मुल्क जी हिन भ्रष्ट हालति जे निवृतीअ जो अॼु बि रुॻो हिकु ही उपाउ आहे, मुल्क में वरी ॿीहर धर्म जी हुकूमत क़ाइम कराइणु। हिन तहरीक जी काम्याबीअ लाइ शुरूआति खां मुल्क जे महान संतनि जो सहकार वठणु तइ कयो वयो। इनजी काम्याबीअ लाइ 2015 में 14 नुख़्तनि जी हिक कार्य योजना छपिराई वई। हुननि ॿुधायो त हींअर इनजी काम्याबीअ जा नतीजा साम्हूं अचण लॻा आहिनि। मुल्क जे 4 शंकराचारनि मां टिनि शंकराचारनि जी रहनुमाईअ में हुननिजा हज़ारें शिश कुछु सालनि खां इन ॾस में वॾी जोशीली भूमिका निभाईन्दे ॾिसिजनि था।